Hepe sa tanod namusil patay

Patay ang usa ka lalaki human gipusil sa usa ka barangay tanod sa Barangay Lumbia ning syudad sa Cagayan de Oro alas 5:00 ang takna sa hapon niadtong Biyernes, Enero 1, 2010.

Ang biktima giila nga si Norman “Bobong” Ragasajo, hingkod ang edad, dunay kapuyo ug molupyo sa sityo Dulawon, sakop sa nasangpit nga barangay.

Samtang gitumbok nga suspek mao si Enerio Bandin, hepe sa Barangay Police sa susamang dapit.

Sa inisyal nga imbestigayon sa mga ginsakpan sa kapolisan sa Police Station 8 (PS8) Barangay Lumbia nga gisulong sa maong akusadong tanod ang biktima dayon pusil ngadto niini.

Naangkon sa biktima ang duha ka samad sa iyang dughan nga maoy hinungdan sa iyang hinanaling kamatayon.

Nakuha gikan sa crime scene ang duha ka basiyo sa bala .45 nga armas nga iya sa barangay ug maong gigamit sa maong suspek sa pagpusil patay sa maong biktima.

Si SPO3 Rick Arandil sa PS8 Lumbia sa interbyu sa mga tigbalita namahayag, nga girespondihan gilayon nila ang maong dapit diin nahitabo ang maong krimin apan abtik usab nga misibat ang maong akusado.

“Amo gilayon nga girespondihan ang dapit, apan wala na usab ang maong suspek,” pamahayag pa niini sa sibyahang DXCC.

Gikabutyag nga sa dihang miadto usab ang mga sakop sa kapulisan sa panimalay sa akusado, wala na usab kini uban sa iyang tibuok pamilya.

“Siguro nahadlok siya nga balosan, mao nga misibat kay human sa maong hitabo daghan kaayo ang nangita kaniya,” butyag pa ni SPO3 Arandil.

Si Lumbia Barangay Chair Whelhim Valencia sa interbyu sa DXCC nagkanayon nga iyang gitugutan nga magdala dala ug pusil ang iyang tanod gumikan kay gitugotan usab kini ni PNP City Police Director Noel Armilla human matud pa kini nakapahigayon og training isip usa ka tanod.

“Duna kanay panugot ni Col. Armilla, ug naka training man usab kana sila,” pamahayag pa niini sa radyo.

Samtang sa iyang bahin hugot usab nga gihimakak ni city police director Armilla ang maong pamahayag ni Kapitan Valencia.

Sa interbyu sa mga tigbalita sa nasangpit nga opisyal sa kapolisan sa syudad kon COCPO kini mibutyag nga wala siyay gihatagan ni bisan kinsa ug panugot sa barangay ilabi na sa barangay tanod nga magdala dala ug armas.

“Dili ka na tinuod nga ako silang gitugutan, gani wala silay permiso sa pagdala dala niana,” pamahayag niini atol sa tulumanong BIRADA sa sibyahang DXCC.

Ning pagbalita, gimando na usab ni Police Supt. Antonio Montalba, ang pagpangita sa maong suspek nga armado sa armas aron sa pagsikop niini.

Nasayran nga wala usab ikahimuot sa deputy city director ang wala pagpahibalo ni Police Senior Inspector Selverio Espiritu nga hepe sa Police Station (PS8) Lumbia ngadto kaniya.

“Ato lamang nga ipanawagan sa mga katawhan kon kinsa man ang nakaila niining maong suspek nga ila dayong itawag diri kanamo aron kini masikop. Ug dili magkompeyansa ang katawhan kay kining tawhana armado ug criminal,” panapos nga pamahayag ni Montalba. Rey B. Cabaraban